News

04Dez

Lachmuskle :-)

 

Si göng itz i ds Fitnesstraining, het si verzellt. Drümal ir Wuche. Mängisch sygs zwar hert, sech uufzraffe. Aber si gspüri, dass es öppis bringi. Nach em Training füel si sech früsch, nümm so verstyft, verchürzt, verchnorzet u verchalchet, sondern beweglech, locker u gsung. Es syg, wie we ihre Bewegigsapparat wider am Strom aagschlosse wär, wie we ds Bluet wider pulsiere – dür alli Adere u Kapillare düre; vom Härz bis zu de chlyne Zäie u bis i di letzschte Hirnzälle u Haarwurzle.
Letschts Mal heige si vor allem der <musculus quadriceps femoris> dra gno – der vierchöpfig Oberschänkelmusku, wo si doch noc vor mene halbe Jahr bim Jogge gäng wider der Chrampf drinn heig gha. U nächschts Mal chön de der <Extensor carpi radialis longus> dra, wo si zwar nid genau wüss, won er isch: Aber d Fitnesslehrere heig gseit, är syg wichtig bim Tennisspile. Beydruckend, we mes so motiviert u fachkundig – u sogar uf Latinisch – versteit, a sym schlaffe Körper z schaffe.
Drum han i nachegluegt, weli wichtige Muskle dass i heimlech u ohne grossi Aasträngig chönnt trainiere – u bi fündig worde: der <musculus levator labii cuperioris> (der Oberlippehäber) zum Byspil, oder der <musculus zygomaticus major>, dä, wo vom Jochbei här d Muulwinkle cha ufezie. Das sy di beide Muskle, won i itz bsungers wott trainiere u gschmeidig mache. Wül: Me bruucht se zum Lache.

Quelle: Buch Drunger u drüber. Autor: Walter Däpp.

  04. Dezember 2014 by Admin MedElan